އަބޫ މޫސާ އަލްއަޝްޢަރީ (ރަޟިޔަﷲ ޢަންހު) ގެ ކިބައިން ރިވާވެގެންވެއެވެ. ނަބިއްޔާ (ﷺ) މި ދުޢާ ވިދާޅުވެ އުޅުއްވިއެވެ.

اَللَّهُمَّ اغْفِرْ لِي خَطِيْئَتِيْ وَجَهْلِيْ وَإِسْرَافِي فِي أَمْرِيْ وَمَا أَنْتَ أَعْلَمُ بِهِ مِنِّي اَللَّهُمَّ اغْفِرْ لِي جِدِّيْ وَهَزَلِيْ وَخَطَئِيْ وَعَمْدِيْ وَكُلُّ ذَلِكَ عِنْدِيْ اَللَّهُمَ اغْفِرْ لِي مَا قَدَّمْتُ وَمَا أَخَّرْتُ وَمَا أَسْرَرْتُ وَمَا أَعْلَنْتُ وَمَا أَنْتَ أَعْلَمُ بِهِ مِنِّي أَنْتَ الْمُقَدِّمُ وَأَنْتَ الْمُؤَخِّرُ وَأَنْتَ عَلَى كُلِّ شَيْءٍ قَدِيْرٌ

އޭ ﷲ! މިއަޅާގެ ކުށްތަކާއި، ޖާހިލުކަމާއި، މިއަޅާގެ ކަންކަމުގައި މިއަޅާއަށް އިސްރާފުކުރެވުނު ކަންތައް ފުއްސަވައިދެއްވާނދޭވެ! އަދި މިއަޅާއަށްވުރެ ބޮޑަށް އިބަރަސްކަލާނގެ ދެނެވޮޑިގެންވާ ކަންތައްތައް ފުއްސަވައިދެއްވާނދޭވެ! އޭ ﷲ! މިއަޅާ ސީރިއަސްކޮށް ކުރި ކަންތަކާއި، ސަމާސާއަށް ކުރި ކަންތަކާއި، އޮޅިގެން ކުރެވުނު ކަންތަކާއި، ޤަޞްދުގައި ކުރި ކަންތައް ފުއްސަވައިދެއްވާނދޭވެ! މި ހުރިހާ ކަމެއް މިއަޅާގެ ކިބައިގައި ވެއެވެ. އޭ ﷲ! މިއަޅާ އިސްކޮށްފައިވާ ކަންތަކާއި، ފަސްކޮށްފައިވާ ކަންތަކާއި، ސިއްރުން ކޮށްފައިވާ ކަންތަކާއި، ފާޅުގައި ކޮށްފައިވާ ކަންތައް ފުއްސަވައިދެއްވާނދޭވެ! އަދި މިއަޅާއަށްވުރެ ބޮޑަށް އިބަރަސްކަލާނގެ ދެނެވޮޑިގެންވާ ކަންތައްތައް ފުއްސަވައިދެއްވާނދޭވެ! އިސްކުރައްވާ ރަސްކަލާނގެއީ އިބަރަސްކަލާނގެއެވެ. އަދި ފަސްކުރައްވާ ރަސްކަލާނގެއީވެސް އިބަރަސްކަލާނގެއެވެ. އަދި އިބަރަސްކަލާނގެއީ ކޮންމެ ކަމެއްގެ މައްޗަށް ކުޅަދުންވަންތަ ރަސްކަލާނގެއެވެ.

Reference: މުސްލިމް: ٢٧١٩