އިބްނު ޢައްބާސް (ރަޟިޔަﷲ ޢަންހު) ގެ އަރިހުން ރިވާވެގެންވެއެވެ. ވިދާޅުވިއެވެ: އެދުވަހު (ބަދުރު ދުވަހު) މުސްލިމަކު މުޝްރިކެއްގެ ފަހަތުން ދުވަމުންދަނިކޮށް، އޭނާގެ މަތިން ޗާބޫކަކުން ޖަހާ އަޑާއި، "އޭ ޙައިޒޫމް ކުރިއަށް ދާށޭ!" ގޮވާލި އަޑު އިވުނެވެ. [1] ދެން އޭނާ، (ކުރިމަތީގައި ހުރި) މުޝްރިކު މީހާއަށް ބަލާލިއިރު އޭނާ ވަނީ ބިންމައްޗަށް ވެއްޓިފައެވެ. އަދި އޭނާ (ކައިރިވެ) ބަލާލިއިރު، އޭނާގެ ނޭފަތުގައި ޖަހާފައިވާ ތަނެއް ހުއްޓެވެ. އަދި އޭނާގެ މޫނުވަނީ ފަޅައިގެންގޮސްފައެވެ. އެއީ ޗާބޫކަކުން ޖަހާފައިވާ ފަދައިންނެވެ. އަދި އެތަންވަނީ ފެހިވެފައެވެ. ދެން އަންޞާރިއްޔަ ބޭކަލަކު ރަސޫލުﷲ (ﷺ) ގެ އަރިހަށް ވަޑައިގެން އެވާހަކަ ކިޔައިދެއްވިއެވެ. އެކަލޭގެފާނު ޙަދީޘްކުރެއްވިއެވެ. "ތިބާ ތިޔަބުނީ ތެދެކެވެ. އެއީ ތިންވަނަ އުޑުން އައި މަދަދެކެވެ." އެދުވަހު (ބަދުރު ދުވަހު) މުސްލިމުން އޭގެތެރެއިން ހަތްދިހަ މީހުން ޤަތުލުކުރިއެވެ. އަދި ހަތްދިހަ މީހުން ހައްޔަރުކުރިއެވެ. [2]

Reference: [1] މަލާއިކަތާ އުފުއްލަވާ އަހުގެ ނަން (ތަރުޖަމާކުރާފަރާތް) [2] މުސްލިމް: 1763